“A bolu”, su film, est unu viazu in intro a su mundu de su cantu a tenore, una de sas espressiones culturales prus importantes de sa Sardigna, est unu bolu lèpiu e grabosu chi nos assinzat sos logos, sas biddas de su tenore, chi nos faghet abbojare sos cantadores e iscurtare sos càntigos. Su cantu a tenore est unu de sos Capolavoros de su Patrimòniu Immateriale de s’Umanidade dae s’annu 2005, ca est una manera de cantare sa poesia e de fagher mùsica chi non tenet assimizos in su mundu intreu, unica e sola est una prende de sos sardos. Unu cussertu de bator cambas diferentes, cun sa boghe chi pesat su càntigu e su tenore, sas àteras tres cambas, Bassu contra e mesu boghe chi l’acumpanzant cun sos corfos issoro, sonos de bula, antigos e cuncordos.
Sos protagonistas de su film sunt sos cantadores sardos, sos tenores, sos apassionados e sa zente de sas biddas. Su film non cheret èssere un’istùdiu de etnomusicologia ma unu contu in sa cale su tenore est sa boghe chi nos lu contat e chi nos lu cantat.
